இந்திய ஜனாதிபதியாக பதவி வகித்து மறைந்த ஏ.பி.ஜே.அப்துல்கலாம் வாழ்க்கை வரலாறு சினிமா படமாக தயாராக இருப்பதாக அதிகாரப்பூர்வமாக அறிவிக்கப்பட்டு உள்ளது.
இதில் அப்துல்கலாம் கதாபாத்திரத்தில் தனுஷ் நடிக்கிறார். இந்த படத்தை ஓம் ராவத் டைரக்டு செய்கிறார். தி காஷ்மீர் பைல்ஸ் படத்தை தயாரித்த அபிஷேக் அகர்வால் ஆர்ட்ஸ் நிறுவனத்தின் கீழ் அபிஷேக் அகர்வால் தயாரிக்கிறார். டி சீரீ|ஸ் நிறுவனத்தின் கீழ் பூஷன் குமார் இணைந்து தயாரிக்கிறார்.
இந்தப் படத்தின் திரைக்கதையை ‘நீர்ஜா‘, ‘மைதான்‘ மற்றும் ‘பர்மானு: தி ஸ்டோரி ஆஃப் போக்ரான்‘ போன்ற புகழ்பெற்ற வாழ்க்கை வரலாற்றுப் படங்களுக்கு எழுத்துப் பொறுப்புகளை வகித்த சைவின் குவாட்ராஸ் எழுதியுள்ளார்.
இயக்குனர் ஓம் ராவத் கூறும்போது, ‘’உண்மையான அரசியல்வாதிகளுக்கு பஞ்சமிகுந்த ஒரு காலத்தில், கலாம் அரசியல் மற்றும் அற்பத்தனத்திற்கு அப்பாற்பட்டவராக இருந்தார். சிறந்து விளங்குதல் மற்றும் உள்நாட்டு கண்டுபிடிப்புகளுக்கு பெயர் பெற்றவர் அவர். அவரது கதையை திரைக்குக் கொண்டுவருவது ஒரு கலைச் சவால் மற்றும் தார்மீக மற்றும் கலாச்சார பொறுப்பு. இது உலகளாவிய இளைஞர்களுக்கும், குறிப்பாக உலகளாவிய தென்னகத்து இளைஞர்களுக்கும் உத்வேகம் அளிக்கும் ஒரு கதை. இது எனது வாழ்க்கையின் மிக முக்கியமான அனுபவம். மக்கள் யாராக இருந்தாலும், எங்கிருந்து வந்தாலும் அவர்களுக்கான அற்புதமான பாடம் அவரது வாழ்க்கை’’என்றார்.
தயாரிப்பாளர் அபிஷேக் அகர்வால் கூறும்போது, ‘’டாக்டர் ஏபிஜே அப்துல் கலாமின் காவிய வாழ்க்கையை பெரிய திரைக்குக் கொண்டுவருவதில் நாங்கள் மகிழ்ச்சியடைகிறோம். இது எங்களுக்கு ஒரு உணர்ச்சிபூர்வமான தருணம். இந்திய சினிமாவின் ஜாம்பவான்களான டி–சீரிஸின் ஓம் ராவத், தனுஷ், மற்றும் பூஷன் ஆகியோருடன் இணைந்து பணியாற்றுவதில் நான் பெருமைப்படுகிறேன். இந்தக் கதையைச் சொல்வதில் நாங்கள் பாக்கியம் பெற்றுள்ளோம், மேலும் நமது உண்மையான பாரத ரத்னா கலாம் ஜியின் பயணத்தை உயிர்ப்பிக்க நாங்கள் ஒவ்வொருவரும் எங்களால் முடிந்த அனைத்தையும் செய்யவுள்ளோம். இது இந்திய சினிமாவின் மிகவும் மதிப்புமிக்க திட்டங்களில் ஒன்றாகும், இது உலக அளவில் ஒரு பிரமாண்டமான திரைப்படமாக இருக்கும்’’என்றார்.
இந்தப் படத்தை அபிஷேக் அகர்வால் மற்றும் பூஷன் குமார் ஆகியோர் இணைந்து வழங்க, அபிஷேக் அகர்வால், பூஷன் குமார், கிருஷ்ணன் குமார் மற்றும் அனில் சுங்கரா ஆகியோர் இணைந்து தயாரிக்கின்றனர்.
